မငိုပါနဲ့ အမေရယ်
================
နွေနေပူပြင်း၊ နံနက်ခင်းဝယ်၊
ရပ်တွင်းစဉ်လိုက်၊ သပိတ်ပိုက်လို့၊
ငိုက်စိုက်ခေါင်းမှာ၊ ထီးမပါနှင့်၊
ဗလာဖိနပ်၊ မကြည့်ရက်တယ်၊
လူထွက်ပါလား၊ သားလေးရယ်၊
မီးတောင်အလား၊ ထိုစကားဖြင့်၊
သနားပိုပို၊ မျက်ရည်ယိုကာ၊
အမေငိုလို့နေပါတယ်။
မိုးသည်းထန်ပြင်း၊ နံနက်ခင်းဝယ်၊
ရပ်တွင်းစဉ်လိုက်၊ သပိတ်ပိုက်လို့၊
ခိုက်ခိုက်တုန်ကာ၊ ထီးမပါနှင့်၊
ဗလာဖိနပ်၊ မကြည့်ရက်တယ်၊
လူထွက်ပါလား၊ သားလေးရယ်၊
မိုးကြိုးသံလား၊ ထိုစကားဖြင့်၊
သနားပိုပို၊ မျက်ရည်ယိုကာ၊
အမေငိုလို့နေပါတယ်။
ဆောင်းနှင်းဒဏ်ပြင်း၊ နံနက်ခင်းဝယ်၊
ရပ်တွင်းစဉ်လိုက်၊ သပိတ်ပိုက်လို့၊
ခိုက်ခိုက်တုန်ကာ၊ စွပ်ဗလာနှင့်၊
ရင်မှာကျင်တက်၊ မကြည့်ရက်တယ်၊
လူထွက်ပါလား၊ သားလေးရယ်၊
တုန်တုန်ရီသား၊ ထိုစကားဖြင့်၊
သနားပိုပို၊ မျက်ရည်ယိုကာ၊
အမေငိုလို့နေပါတယ်။
အမေမွေးထား၊ ဒီချစ်သားသည်၊
ဘုရားမြတ်စွာ၊ သာသနာတွက်၊
ကောင်းစွာသာသနာ၊ ပြုနေတာမို့၊
ရင်မှာပီတိ၊ ဂွမ်းဆီထိကာ၊
ကျသည့်မျက်ရည်၊ သုတ်လိုက်ပါ၊
အမေ့ကျေးဇူး၊ မြင့်မိုရ်ဦးကို၊
အထူးမွန်စွာ၊ မြတ်ဓမ္မာဖြင့်၊
ကောင်းစွာကြည်ညို၊ သားဆပ်လိုသည်၊
မငိုပါနဲ့အမေရယ်။ ။
၎င်းကဗျာသည် အမေနှင့် တကွ
Online ပေါ်မှ မိခင်များနှင့်
သာသနာ့မိခင်ဖြစ်သည့်
ဆွမ်းဒကာမအားလုံးသို့ ရည်ညွှန်းပါသည်။ ။
credit
No comments:
Post a Comment